Mokabat sa PHP802K nga smuggled cigarettes ang nasakmit sa kapulisan gikan sa duha ka mga indibidwal sa gilusad nga intelligence-driven operation sa Patrol Base, Purok 4, Barangay Cabilinan, Aurora, Zamboanga del Sur,adlaw’ng Miyerkules, Octubre 07, 2025.
Ang mga dinakpan mao sila alyas “Jamal”, 33 anyos, RTW retailer, ug si alyas “Camar, 63 anyos, managsamang lumulupyo sa Dipolog City, Zamboanga del Norte.
Sa report sa kapulisan, ang maong mga inismagol nga sigarilyo gikarga sa mga suspetsado sa usa ka Toyota Tamaraw FX nga naggikan pa sa Sultan Naga Dimaporo, Lanao del Norte paingon unta sa Molave, Zamboanga del Sur.
Apan pag-abot sa lugar may nakaset-up nang checkpoint operation sa mga otoridad diin pakyas usab nga nakapakita ang maong mga indibidwal sa gikinahanglan nga mga dokumento hinungdan nga nadakpan kini.
Nalakip sa mga nabawi sa otoridad gikan sa duha ka mga suspetsado ang 14 ka mga master cases sa Champion White cigarettes sa gibana-banang kantidad nga P802,000 basi sa standard tariff sa Bureau of Customs.
Ang mga dinakpan lakip ang mga nabawi nga mga butang giturn-over ngadto sa Bureau of Customs Satellite Office sa syudad sa Pagadian alang sa dokumentasyon ug tukmang lakang.
Source: PD ZSPPO
