Nagpadayon ang buhatan sa Social Security System (SSS) -Iligan City Branch sa ilang paningkamot nga mabalik ang mga kanhing Job Order (JO) nga miyembro sa gobyerno isip regular nga miyembro sa SSS.
Matod pa ni Jose Roel Herbieto, Branch Manager II, sa SSS -Iligan nga ilang gipaningkamotan nga mapalig-on ang pag-apil sa SSS sa mga Job Order nga nagtrabaho sa mga LGU ug munisipyo, tungod kay dili sila sakop sa GSIS.
Dugang pa ni Herbieto, ilang namatikdan nga ning tuig 2025, mihinay ang hulog sa monthly contribution sa SSS gikan sa mga JO. Busa, mihimo ang SSS og mga lakang aron bisitahan ang mga government offices ug ipahimutang nga compulsory ang pag-apil sa SSS alang sa mga JO.
Tumong niini nga lakang mao ang paghatag ug proteksyon sa mga Job Order nga nagtrabaho sa gobyerno, aron matabangan sila labi na sa panahon sa contingency o emergency.
