Nanawagan ang Catholic Bishops Conference of the Philippines (CBCP) alang sa usa ka “National Day of Prayer and Public Repentance” karong Oktubre 7, agig tubag sa nagpadayong mga kalamidad ug nagkagrabeng isyu sa korapsyon sa nasud.
Sa pormal nga sulat nga giluwatan ni CBCP President Cardinal Pablo Virgilio David, iyang gidasig ang tanang parokya, simbahan, Katolikong eskwelahan, pamilya, ug nagkalain-laing organisasyon nga nakabase sa simbahan nga magtigom alang sa usa ka adlaw sa sinsero nga pag-ampo ug nasudnong paghinulsol.
Matod ni Cardinal David, kining maong panawagan resulta sa padayong kadaot sa mga kalamidad—sama sa sunodsunod nga mga bagyo, linog, ug baha—ingon man sa nagkagrabeng mga isyu sa korapsyon ug kakuwang sa tulubagon sa gobyerno.
Dugang pa niya nga ang National Day of Prayer dili lang para sa mga Katoliko kondili bukas usab sa tanang magtutuong Pilipino nga gustong moduyog sa panawagan sa paglaom ug kausaban.
Isip kabahin sa inisyatiba, ang CBCP nag-andam ug espesyal nga pag-ampo nga i-recite kada adlaw gikan sa Oktubre 8 (Martes) hangtod sa Kapistahan ni Kristo nga Hari sa Nobyembre 23, nga pag-ampo sa mga Misa, rosaryo, ug prayer gatherings sa mga panimalay, eskwelahan, ug simbahan.
via: Veritas PH
