Mipahimangno ang Department of Social Welfare and Development (DSWD) -Ipil sa pipila ka mga benepisyaryo sa Pantawid Pamilyang Pilipino Program (4ps) nga wala nagpakabana sa kaayuhan sa ilang mga anak bisan pa nga nakadawat sila sa ayuda gikan sa gobyerno.
Base sa monitoring ug evaluation sa DSWD, nadiskobrehan nga adunay pipila ka pamilya nga wala naggamit sa husto ang ilang cash grants ug imbes gastuhon alang sa pagkaon, edukasyon, ug panglawas sa ilang mga anak, nasayang kini sa dili angay nga paggasto.
Matod pa sa DSWD Ipil, adunay mga insidente diin ang kwarta gigamit sa bisyo sama sa inom ug sugal, hinungdan nga nagpabilin ang kakulang sa nutrisyon ug edukasyon sa mga kabataan nga mao untay tumong sa programa.
Gipasabot usab sa ahensya nga padayon silang nagahimo og family development sessions (FDS) ug monitoring aron ipahinumdom sa tanang benepisyaryo sa ilang obligasyon isip ginikanan ug responsableng tagadawat sa ayuda.
Gidugang pa sa DSWD nga posible nga tangtangon ang benepisyo sa mga pamilyang padayon nga mosupak sa mga kondisyon sa programa sama sa pagpa-eskwela sa anak ug pagsiguro sa regular nga check-up sa health center.
Photo Courtesy to:Pressone.ph
