Gidala sa tambalanan ang duha ka biktima tungod sa kritikal nga kahimtang dihang gitabangan og kulata sa grupo sa mga batan-on, niadtong nakalabay nga adlaw, alas 2:30 sa kadlawon, sa Brgy. Lipata, Surigao City.
Nakadawat ang Surigao City Police Station kabahin sa riot nga nahitabo sa lugar. Naabtan ang biktima nga naputos sa dugo ang nawong nga naila sa Alyas IAN, 17 years old, Grade 12 student, taga Narciso Street, Brgy. Taft, Surigao City.
Samtang samaran usab ang usa ka Alexis Pementel Loreto, 19 years old, Grade 12 student residente sa Purok 2, Brgy. Tugbongon, Surigao City.
Sa imbestigasyon sa kapulisan, si Alyas IAN ug John, nag-inom kini duol sa Almont Beach Resort, mas naila ang lugar nga “City Street.”
Sumala pa, pauli na unta ang duha ka binuhat dihang giatangan sila sa grupo sa suspek nga si Albert Rasonabe Moreno, 23 ug Mark John Rasonabe Matin-ao, 18 anyos, ug uban pang batan-on.
Didto nagsugod ang karambola nga misangpot sa pisikal nga away. Si John Alexis gisumbag sa nawong, samtang si IAN giposposan sa likod gamit ang usa ka puthaw nga tubo kinsa ang suspek naila nga si Mark John Rasonabe Matin-ao, nga positibong giila sa biktima.
Human sa maong hitabo misibat sila Ian ug John sakay sa motorsiklo paingon sa Brgy. Ipil. Apan gigukod sila sa grupo sa mga suspetsado.
Pag-abot nila sa tulay sa Brgy. Lipata, kalit nga gibato sa ulo si Ian hinungdan nga na-disgrasya sila ug natumba sa motor sa sementadong kalsada. Tungod niini, si Ian nagrabehan og daghang samad sa lawas, samtang si John Alexis samdan sa aksidente.
Si Mark John Rasonabe Matin-ao nadakpan sa mga pulis ug si Albert gidala usab sa Police Station samtang giandam na ang tukmang kaso batok sa mga suspek.
