Human mi-resign sa Commission for Infrastructure (ICI), isip special adviser, si Baguio City Mayor Benjamin Magalong gipanghimakak niini ang mga pasangil nga naglambigit niya sa kurapsyon sa dakbayan.
Gibutyag ni Magalong nga lisod ang iyang desisyon sa pagbiya sa ICI apan kinahanglang huptan ang kredibilidad sa komisyon. Dugang pa sa mayor nga wala siyay labot sa mga kuwestiyonableng proyekto ug walay “conflict of interest” sa iyang pagtalaga sa ICI.
Uban sa pag-resign, gikataho ang pagkalambigit ni Magalong sa duha ka proyekto sa imprastraktura sa Baguio City kaniadtong 2022 kauban ang magtiayong kontraktor nga sila Pacifico ‘Curlee’ ug Cezarah ‘Sarah’ Discaya. Kalabot niini, gisuspenso usab ni DPWH Secretary Vince Dizon ang unom ka mga opisyal sa Baguio District Engineering Office.
Una nang nimando si Magalong og managlahing imbestigasyon sa Baguio City Council alang sa nalangan nga mga proyekto sama sa tennis court ug parking lot sa Burnham Park.
Kahinumduman nga si Magalong gitudlo sa komisyon niadtong Septiyembre 13 ni Presidente Ferdinand Marcos Jr., uban nila ni kanhi Supreme Court Justice Andres Reyes Jr., kanhi DPWH Secretary Rogelio “Babes” Singson, ug SGV executive Rossana Fajardo.
Sa kataposang pamahayag ni Magalong, nanawagan kini sa mga Pilipino nga dili tugotan nga kawaton sa mga kurakot nga opisyal ang kaugmaon sa kabatan-onan ug kaugmaon sa nasud.
Photo courtesy to:PNA
