Nasunog ang generator set sa Central Warehouse Club sa Kidapawan City, alas 5:37 sa kahaponon niadtong nakalabay nga adlaw.
Sumala pa ni Fire Officer 1 Adonis Delos Reyes ang Intelligence and Investigation Unit Staff sa Bureau of Fire Protection Kidapawan, nga human sa pagdawat sa maong taho, daling niadto sa fire scene ang mga personahe sa BFP kauban ang tulo ka fire truck.
Dugang pa, napalong na ang maong sunog dihang niabot ang mga bombero tungod nihimo usab og aksyon ang mga maintenance staff sa naasoy nga establisyemento aron mapalong ang kalayo gamit ang fire extinguisher.
Sa imbestigasyon sa BFP Kidapawan, tungod sa pagkawala sa kuryente, gipaandar sa maintenance staff ang generator ug gipakusgan ang RPM aron mamintenar ang ginahatag niini nga kuryente, nga usa sa ginatan-aw sa BFP nga hinungdan mao ang overheat ug tungod sa walay tarong nga ventilation ang nahisgutang generator.
Anaa sa P5,000 ang gibana-bana nga damyos sa maong sunog, ug matod pa sa BFP nga pwede pang magamit ang maong generator set.
Nanawagan usab si Delos Reyes sa publiko, nga kanunay tan-awon o bantayan ang mga generator labi na og ginagamit kini ug siguraduhon nga adunay tamang ventilation aron malikayan ang sunog.
