Nagtuo ang Malacañang nga magpabilin nga lig-on ang pagsalig sa mga foreign investor sa Pilipinas bisan pa sa mga alegasyon sa korapsyon sa pipila ka proyekto sa imprastruktura.
Matod ni Palace Press Officer USec. Claire Castro nga ang lig-on nga baruganan ni Presidente Ferdinand Marcos Jr. batok sa korapsyon nagahatag og kasiguruhan sa publiko ug sa international community nga seryoso ang gobyerno sa pagpasiugda sa transparency ug accountability.
Dugang pa niini nga ang kaisog sa Presidente sa pagpanghayag sa mga iregularidad, bisan pa sulod sa iyang administrasyon, nagpakita sa sinseridad sa gobyerno sa pagpanglimpyo sa han-ay sa panggamhanan.
Gipasiugda usab sa Malacañang nga si Presidente Marcos mao ang unang lider sa nasud nga nagpasiugda og imbestigasyon sa dagkong anomaliya sa mga proyekto sa gobyerno, bisan kini nahitabo sulod sa iyang termino.
Nagmugna ang Presidente og Independent Commission for Infrastructure (ICI) nga ang tumong mao ang pagsusi sa mga anomalya sa mga flood control ug uban pang proyekto sa Department of Public Works and Highways (DPWH) sulod sa miaging 10 ka tuig, ug pagrekomenda sa hustong kaso batok sa mga apil nga opisyal ug indibidwal.
Naglaom ang panggamhanan nga possibleng mulambo pa ang ekonomiya pinaagi sa pagtubag sa kurapsyon sa nasud.
Photo courtesy to:Government of the Philippines
