Daog si Filipino-American singer nga si Jessica Sanchez sa ika-20 nga season sa America’s Got Talent (AGT). Gipahibalo ang resulta niadtong Setyembre 25, human sa public voting nga misangpot sa iyang pagkadaog.
Sa final performance, gikanta ni Jessica ang iyang version sa “Die With A Smile” usa ka mashup sa kanta ni Bruno Mars ug Lady Gaga. Nakadawat siya og standing ovation gikan sa tanang hurado.
Bisan siyam na ka bulan nga buntis, misaka gihapon siya sa stage ug gihatag ang iyang labing maayo.
Sa iyang pasalamat nga speech, miingon siya: “Emosyonal kaayo ko karon… Kini usa ka talagsaon nga kahigayunan. Daghang salamat, America.” Gikumpirma usab niya nga kulbaan siya samtang nag-perform, tungod kay hapit na siya manganak: “Hapit na gyud ko manganak, mao nga medyo lisod pero super excited ko. Talagsa ra gyud ni mahitabo.”
Nagpasalamat usab siya sa iyang fans ug sa tanang Pinoy nga misuporta kaniya:“Salamat kaayo sa inyong suporta. Kung wala mo, dili gyud ko makaabot ani. Gihatag nako ang tanan para ninyo.”
Si Jessica unang niapil sa AGT 9 years old pa siya, sa Season 1, diin nakaabot siya sa semi-finals. Karon, nahimong champion siya sa Season 20 – dugay nga damgo nga natuman human sa kapin usa ka dekadang paghulat ug paningkamot.
Photo courtesy to:Philstar.com
