Nitambong si kanhi Senate finance committee chairperson Senadora Grace Poe sa pagdungog sa Independent Commission for Infrastructure (ICI) aron ipasabot ang proseso sa paghimo sa nasyonal nga budget.
Sa atubangan sa komisyon, giklaro ni Poe nga wala kini nalambigit sa gitawag nga “small committee” sa bicameral conference committee diin gialegar kini nga adunay mga kuwestiyonableng insertions o dugang sa budget.
Matod pa niini wala kini mitambong sa bisan unsang closed-door meeting o gamay nga grupo kauban ang mga representante gikan sa Kamara.
Gipasabot usab ni Poe nga ang tanang amendments gi-aprubahan sa bicameral hearing ug gipaabot sa Department of Budget and Management (DBM).
Una na nga mitambong sa imbestigasyon sila Senate President Vicente “Tito” Sotto III ug Senador Panfilo Lacson, nga susama nga mitindog nga ilegal ang mga insertion nga gisulod pagkahuman sa bicam hearings.
Nagpadayon ang imbestigasyon sa ICI mahitungod sa matud pa iregularidad sa pag-apod-apod sa pondo alang sa imprastruktura.
Photo courtesy to:Politiko
