Kapin 84 ka pulis ang samaran atol sa halapad nga lihok-protesta nga gihimo kagahapon, Setyembre 21, 2025, sumala sa National Capital Region Police Office (NCRPO).
Base sa datos sa Philippine National Police (PNP), 15 sa mga pulis ang gidadala sa ospital tungod sa samad sa ulo, bukton, paa ug mata, diin usa kanila ang gipailalom sa operasyon human ma lacerate ang iyang bukton.
Sa pikas bahin, 72 ka militante ang nadakpan human mi-ulbo ang tensyon sa Ayala Bridge ug Mendiola. Ang mga dinakpan pasakaan og kaso sama sa paglapas sa Public Assembly Act 880, resistance o disobedience to authority, direct assault, malicious mischief, ug serious physical injuries.
Bisan pa sa kagubot, gipahayag gihapon sa PNP nga generally peaceful ang dagan sa gipahigayon nga “Trillion Peso March” kontra korapsyon.
Matod ni Acting PNP Chief Lt. Gen. Jose Melencio Nartatez Jr., ang nahitabong kagubot kay gikonsedera nga “isolated case” lamang. Giila usab niya ang sakripisyo sa mga kapulisan nga nagbantay aron mapadayon ang kalinaw sa maong rally.
Sa pagbana-bana sa PNP, miabot sa 61,605 ka raliyista ang miapil sa tibuok nasud, diin 33,720 niini kay gikan sa Metro Manila ug 27,885 gikan sa ubang rehiyon.
Mahitungod sa seguridad, kapin 50,000 ka pulis ang gipakatap sa tanang dapit, diin 29,300 niini gibutang sa Metro Manila isip bahin sa Civil Disturbance Management (CDM) Units.
Lakip sa mga na record nga kagubot mao ang pagpang bato sa mga kapulisan ug ang pagpanunog sa usa ka trailer truck nga duol sa Ayala Bridge sa Maynila.
Photo courtesy: Manila Public Information Office
