Gipahibalo sa Bangko Sentral ng Pilipinas (BSP) nga ginalimitahan na lamang ngadto sa ₱500,000 ang ma-withdraw nga kwarta sa usa ka transaksiyon matag adlaw.
Kini nga lakang gimando sa taliwala sa nagpadayon nga imbestigasyon sa anomalya sa flood control projects, diin nasayran nga gipaagi sa mga bangko ang “kickbacks” gikan sa maong mga proyekto. Sa samang higayon, ang Anti-Money Laundering Council (AMLC) misugo usab og freeze order batok sa 135 bank accounts ug 27 insurance policies.
Matod ni BSP Governor Eli Remolona Jr., gisugo na ang tanang financial institutions nga ginabantayan sa BSP nga magpatuman og enhanced due diligence (EDD) ilabi na sa mga dagkong cash transactions aron mapugngan nga magamit kini sa ilegal nga aktibidad.
Ang maong direktiba gihimo ubos sa Circular No. 1218, series of 2025 nga nagtinguha nga palig-onon ang integridad sa financial system ug palig-onon ang kampanya kontra sa money laundering ug terorismo.
Subay niini, ang tanang bangko ug financial institutions gimanduan nga magpatuman og istriktong polisiya sa pagdumala sa cash transactions. Kon molapas sa ₱500,000 ang withdrawal, kinahanglan nga ipailawom kini sa dugang nga EDD measures ug ang customer obligadong motanyag og dugang nga identification information ug pagpamatuod sa lehitimong katuyuan sa negosyo o transaksiyon.
Gipasabot usab sa BSP nga ang withdrawals nga molapas sa threshold mahimong himoon pinaagi sa tseke, fund transfer, direct credit sa deposit account, o digital payment platforms.
Kung mapakyas ang usa ka financial institution sa pagtuman sa maong proseso, obligado kini nga magsumite og suspicious transaction report ug mas hugot nga bantayan ang account sa customer.
Ang direktiba mahimong epektibo sulod sa 15 ka adlaw human mapatik sa Official Gazette.
Photo courtesy: BusinessMirror
