Gikumpirma sa Department of Agriculture (DA) nga hapit na ilusad ang programang “Benteng Bigas, Meron Na!” nga eksklusibong itanyag alang sa mga pampublikong magtutudlo ug non-teaching personnel.
Kini ang gipasabot ni Agriculture Secretary Francisco Tiu Laurel Jr. human sa malampusong paglusad sa ₱20 per kilo rice program nga unang gipakanaog alang sa mga drayber sa jeepney, tricycle, ug uban pang trabahante sa pampublikong transportasyon nga gilusad kagahapon.
Base sa plano sa DA, target nila nga makabaligya ug mga 1,000 ka tonelada nga bugas matag adlaw pagsugod sa Oktubre 2025 ubos sa maong programa.
Ubos sa maong programa, matag pamilya makapalit ug hangtod napulo (10) ka kilo nga bugas matag bulan pinaagi sa Kadiwa ng Pangulo. Matud pa aron masiguro ang padayon nga kalampusan ug pagpalapad sa programa, nigahin ang gobyerno ug dugang ₱10 bilyon sa 2026 budget.
Kini nga pondo ihatag aron masuportahan ang operasyon ug masiguro nga magpadayon ang pagpalapad sa programa sa umaabot nga mga tuig.
Photo courtesy:Provincial Government of Bataan
