Usa ka daredevil stuntman sa Austria ang nagpabilib sa publiko human niyang giguyod ang usa ka sakyanan samtang nasunog ang tibuok niyang lawas.
Si Josef Tödtling, mas nailhan isip “Burning Joe” tungod sa iyang reputasyon sa mga full body burn stunts, maoy unang tawo nga nakakuha og record para sa “pinakapaspas nga 100 metros nga pagbitad og sakyanan samtang nagdilaab ang lawas.”
Nakuha niya kini sa oras nga 56.42 segundos didto sa Vienna niadtong Hunyo 24. Sa usa ka katingalahang video, makita si Josef nga gigamit ang tanan niyang kusog aron birahon ang sakyanan sa kalsada samtang ang iyang lawas nagdilaab sa kalayo.
Anaa pud ang usa ka tawo nga nagdala og fire extinguisher, nga andam moresponde kung adunay mahitabo nga dili maayo sa stunt.
Pagkahuman niya sa 100 metros, nitagak siya sa yuta ug dali siyang gitabangan sa iyang mga kauban aron palongon ang kalayo.
Photo courtesy: Guinness World Records
