Nipadayag sa ilang kaandam ug suporta ang Armed Forces of the Philippines (AFP) ngadto sa Department of Public Works and Highways (DPWH) human ang ahensya nangayo sa ilang tabang sa pagpahigayon og inspeksyon sa nagkadaiyang flood control projects sa nasud.
Matud pa ni AFP Spokesperson Col. Francel Margareth Padilla, ang ilang han-ay nag-ila sa hingpit nga kapasidad sa DPWH alang sa pagpatuman sa maong mga proyekto. Dugang niya andam ang Armed Forces sa paghatag og tabang pinaagi sa seguridad ug uban pang tahas isip kabahin sa ilang suporta sa ahensya sa mga inisyatiba niini.
Dugang pa ni AFP Public Affairs Office Chief Col. Xerxes Trinidad, nagpaabot na lang ang ilang tropa sa opisyal ug pormal nga hangyo sa DPWH alang sa unsa nga mga partikular nga tahas ug asa sila magsugod sa paghatag og tabang sa ahensya.
Wala pay nadawat nga pormal nga dokumento ang AFP kalabot niini nga gipaabot pa sa Armed Forces aron ilang mapatuman ang ilang tabang sa inspeksyon sa nasangpit nga departamento.
Sa laing bahin, ang Philippine National Police (PNP) una nang mipadayag sa ilang kaandam sa paghatag og seguridad ug uban pang matang sa tabang sa pag inspeksyon ug pag-verify sa ubang flood control projects sa nasod.
Photo courtesy:PING LACSON
