Nipasidaan ang State Weather Bureau nga niabot sa 70% ang posibilidad sa La Niña formation tungod sa padayong pagbugnaw sa temperatura sa Central ug Eastern Equatorial Pacific (CEP).
Matod sa ahensya, posibleng magsugod ang La Niña tali sa Oktubre-Nobyembre-Disyembre ning tuiga ug mahimong molungtad hangtod sa Disyembre 2025 hangtod sa Pebrero 2026.
Tungod niini, nipagawas og La Niña Alert ang ahensya.Kahinumduman nga niadtong Agosto, ang State Weather Bureau nipagawas na og La Niña Watch human nisaka ngadto sa kapin 55% ang posibilidad nga maporma kini.
Sa kasaysayan, ang La Niña kanunay nga hinungdan sa mas daghang mga bagyo sa katapusan sa tuig. Sa pinakaulahing Forecast, mas dako ang kahigayonan sa above-normal nga pag-ulan sa dagkong bahin sa nasud tungod sa lain-laing weather system nga magdala og mga pag-ulan sama sa southwest monsoon, kusog nga thunderstorm, low pressure area (LPAs), easterlies, shearlines, ug intertropical convergence zones (ITCZ).
Kini nga mga sistema mahimong hinungdan sa pagbaha ug pagdahili sa yuta sa mga lugar nga huyang. Kalabot niini, giawhag sa ahensya ang publiko nga mangandam ug mopatuman og tukma nga pag-amping batok sa posibleng epekto sa pagbaha ug pagdahili sa yuta tungod sa La Niña.
Photo courtesy:PNA
