Nagsugod na sa Pag-isyu og subpoena ang Department of Justice (DOJ) batok sa mga indibidwal nga giingong nalambigit sa kontrobersyal nga pagkahanaw sa mga sabungero sa nasud.
Matod ni DOJ Assistant Secretary Jose Dominic Clavano IV, lakip sa unang gipadad-an og subpoena mao ang negusyante nga si Charlie “Atong” Ang, aktres nga si Gretchen Barretto, ug kanhi hepe sa National Capital Region Police Office (NCRPO) nga si General Jonnel Estomo, uban sa kapin 60 ka uban pa.
Si Ang ug Barretto nag-atubang sa kasong multiple murder ug serious illegal detention nga gisang-at sa mga pamilya sa mga missing sabungero. Matod sa mga reklamante, ang mga nasangpit may kalambigitan matod pa sa sunodsunod nga pagkahanaw sa mga sabungero nga nahimong estorya sa nasud sukad niadtong 2022.
Ang mga subpoena nga gipagawas nag-ingon nga ang akusado kinahanglang moatubang sa preliminary investigation nga ipahigayon sa panel sa DOJ prosecutors.
Si Ang ug uban pang mga ngalan nga nalambigit sa kaso kaniadto gibutang sa usa ka immigration lookout bulletin order (ILBO), isip bahin sa mga lakang aron masiguro nga dili sila makabiya sa nasud samtang nagpadayon ang imbestigasyon.
Gilauman usab nga mopagawas ang DOJ og dugang impormasyon samtang nagpadayon ang preliminary proceedings.
via: DOJ
