Mapasigarbuhon nga nakasulod ang Bukidnon Provincial Tourism Office sa Kaamulan Festival sa ATOP Pearl Awards ubos sa Best Cultural Festival – Provincial Level category. Ang Kaamulan Festival giila isip usa sa Top 3 Finalists, diin ang final defense gipahigayon sa University of Santo Tomas, Manila.
Nagrepresentar sa Bukidnon sila si Mr. Butch Anthony G. Melendez, Mr. Cornelio Melan L. Cruz II, ug Mr. Arthur Czar B. Quisado sa Provincial Tourism Office. Ang kataposang resulta ipahibalo atol sa 26th National Convention sa Association of Tourism Officers of the Philippines (ATOP) karong umaabot Oktubre sa Baguio City.
Kini nga pag-ila nagpamatuod sa lig-on nga pasalig sa Bukidnon sa pagpreserbar sa kultura ug malungtarong kalamboan sa turismo.
Ang ATOP Pearl Awards, nga gihimo sa Association of Tourism Officers of the Philippines (ATOP) kauban ang Department of Tourism, giila nga labing halangdong pasidungog sa turismo sa tibuok nasud. Kini nagapasidungog sa mga programa nga nagapanalipod sa kultura, nagapasiugda sa panulondon, ug nagasuporta sa malungtarong kalamboan.
Ang Kaamulan Festival, nga ginaselebrar matag tuig, nagpabilin nga timaan sa garbo sa kultura sa Bukidnon, diin gipakita ang bahandi sa tradisyon ug panaghiusa sa pito ka lumad nga tribo sa probinsya
PHOTO COURTESY TO: FESTIVE PINOY
