Gi-postpone sa Pre-Trial Chamber I sa International Criminal Court (ICC) ang gikatakda nga pagdungog alang sa pagkumpirma sa mga kaso batok ni kanhi Presidente Rodrigo Duterte, nga orihinal nga gikatakda sa Setyembre 23, 2025.
Ang desisyon resulta sa usa ka hangyo gikan sa kampo sa kanhi presidente, nga nag-ingon nga dili siya “angay nga husayon” tungod sa dili maayo nga kahimtang sa panglawas.
Sa usa ka opisyal nga pahayag, ang ICC nag-ingon nga usa ka limitado nga pag-postpone ang gipatuman aron tugutan ang usa ka hingpit nga paghisgot sa gisumite nga medikal nga hangyo, ingon man ang uban pang mga ligal nga isyu nga may kalabotan niini.
Apan, ang desisyon dili unanimous. Si Judge María del Socorro Flores Liera mipagawas og dissenting opinion, kusganong misupak sa pag-postpone sa pagdungog. Matod niya, kinahanglang magpadayon na ang proseso aron mahatagan og hustisya ang mga biktima sa giingong krimen ubos sa pamunoan ni Duterte.
Kahinumdoman nga si Duterte gidakop niadtong Marso 11, 2025, tungod sa mga krimen batok sa katawhan lakip na ang pagpatay, torture, ug pagpanglugos, nga giingong nahimo atol sa iyang pamunoan sa Davao City ug sa iyang termino isip Presidente sa Pilipinas gikan 2016 hangtod 2022.
Samtang, wala pay gipagawas nga bag-ong petsa sa pagdungog, samtang gipaabot pa ang opisyal nga eksaminasyon sa panglawas ni Duterte ug ang tubag sa prosekusyon sa gisumite nga hangyo sa depensa.
via: ABOGADO
