MINERO WAY SWERTENG NABUTHAN ANG KAMOT UG GIDAKOP SA KAPULISAN

Gidakop sa kapulisan ang usa ka lalaki human nagpabuto og illegal nga armas alas 6:30 sa buntag, niadtong nakalabay nga adlaw sa Purok Galingan, Barangay Mankilam, Tagum City, Davao del Norte.
Giila ang suspetsado nga si Reycarlo Delo Santos Plando, 25 anyos, ulitawo, minero ug residente sa Barangay Magnaga, Pantukan, Davao de Oro.

Nakit-an siya nga nagkadugo ang kamot gumikan sa igo sa bala gikan sa iyang kaugalingong armas.
Sumala sa testigo nga si Jollibee Tibay, 36 anyos, negosyante ug tag-iya sa boarding house diin nagpuyo ang suspek, nakadungog siya og kusog nga paglanog gikan sa sulod sa balay.

Pagsuta niini, nakita niya ang suspek nga samaran ug ang pusil gibiyaan niini sa giingong lugar.
Gidala gilayon ang suspek sa iyang inahan ngadto sa Davao Regional Medical Center, samtang ang Barangay Tanod nga si Rodel Domingo, 43 anyos, nakasakmit og usa ka homemade KG9 firearm nga walay serial number, magazine nga adunay pito (7) ka buhing bala nga 9mm, ug usa ka empty shell sa gipuy-an niini.

Sa ospital, gidakop sa kapulisan si Plando tungod sa kaso sa iligal nga pagpabuto og armas ug paglapas sa RA 10591 kon Comprehensive Firearms and Ammunition Regulation Act.

Wala kini nakapakita og mga dokumento nga legal sa iyang paghupot og mga delikadong hinagiban.
Sa kasamtangan, ang imbestigador nag-andam na sa mga papeles alang sa pormal nga kaso nga isang-at batok sa maong suspetsado.