Pormal nga gi-turnover ngadto sa Provincial Government sa Bukidnon ang duha ka kanhi mga rebelde, giilang sila alyas Shaggy ug Pia isip kabahin sa reintegration ug peace building program sa gobyerno niadtong Setyembre 5, 2025, sa Headquarters sa 403rd Infantry “Peacemaker” Brigade, Camp Osito D Bahian, Malaybalay City
Gipangulohan ang seremonya nila Governor Rogelio Neil P. Roque, Major General Michele B. Anayron Jr., Commander sa 4th Infantry “Diamond” Division, ug Brigadier General Seigfred C. Tubalado sa 403rd Infantry “Peacemaker” Brigade
Nahibaloan ang duha ka indibiduwal, kinsa kaniadto adunay mahinungdanong papel sulod sa North Central Mindanao Regional Committee (NCMRC), boluntaryong mitahan ngadto sa pwersa sa gobyerno niadtong Setyembre 2, 2025 diin ang ilang desisyon resulta sa nahitabong engkwentro sa kasundalohan batok sa liderato ug mga elemento sa NCMRC sa Saldab Complex sakop sa utlanan sa dakbayan sa Malaybalay ug lungsod sa Impasug-ong niadtong Agosto 2025.
Gipasiugda ni Gobernador Roque nga ang kagamhanang probinsiyal, uban sa Armed Forces of the Philippines, nagpabiling lig-on sa ilang pagtinguha sa kalinaw ug kalamboan ubos sa inisyatiba kabahin sa Enhanced Comprehensive Local Integration Program (E-CLIP) sa gobyrno ug uban pang mga programa sa reintegrasyon nga gidesinyo sa pagtabang sa mga kanhi rebelde sa pagtukod pag-usab sa ilang kinabuhi, pagpalambo sa kalamboan sa komunidad, ug pag-uswag sa malungtarong kalinaw sa Bukidnon.
Gisubli usab ni Major General Anayron Jr. ug Brigadier General Tubalado ang pasalig sa militar dili lamang sa pagsiguro sa mga komunidad batok sa hulga sa insurhensya kondili sa paghatag usab sa usa ka kamot sa pakig-uli niadtong andam nga mobalik sa panon sa balaod.
via: 403rd Infantry “Peacemaker” Brigade Philippine Army
