Nagpasaka og kaso si Mark Stephen Zuckerberg, usa ka bankruptcy lawyer sa Indiana, Estados Unidos, batok sa Facebook human sa balik-balik nga pagtangtang sa iyang account tungod sa alegasyon nga siya nagpakaaron-ingnon sa Meta CEO nga si Mark Zuckerberg.
Matod sa abugado, kapin $11,000 na ang iyang nagasto para sa Facebook ads apan kanunay gihapon nga gi-disable ang iyang business ug personal pages. Tungod niini, daghang kliyente ang nawala ug dako ang kadaot sa iyang praktis.
Giingon usab niya nga dugay na siyang nagdala sa ngalan nga Mark Zuckerberg ug kini nakaapekto sa iyang personal nga kinabuhi, lakip ang pagdawat og death threats, sobra 100 friend requests matag adlaw, ug kalibog sa mga tawo nga naghunahuna nga siya mao ang bilyonaryo.
Sa pahayag sa Meta, giingon nga ilang gisuta ang isyu ug giila nga daghan og tawo nga parehas og ngalan sa ilang CEO.
Karon, gipangayo sa abugado ang bayad sa danyos ug legal fees isip kompensasyon sa pagkawala nga iyang nasinati.
source: The Daily Guardian
