Gipahimangnoan sa Department of Trade and Industry (DTI) ang publiko, hilabi na ang mga namalit online, batok sa mga mangingilad o scammer nga aktibo karong panahon sa “ber months.”
Dugang pa niini, tungod kay kasagaran mousbaw ang mga transaksyon online kon hapit na ang Pasko, hinungdan nga mahimong oportunidad kini alang sa mga mapahimuslanon.
Gitumbok sa DTI nga importante nga magbantay ug mag-amping ang mga konsumidor sa online aron malikayan nga mahimong biktima sa scam.
Matod sa DTI, ang usa ka customer kinahanglan nga mahibalo sa mga “red flag” o timailhan nga posibleng scam ang usa ka online seller sa dili pa magdesisyon nga mag-add-to-cart ug mag-checkout sa ilang mga paliton.
Ang pagkamaampingon makatabang aron maprotektahan ang kaugalingon gikan sa mga dili lehitimong negosyante. Apil sa mga red flag o indikasyon nga posibleng scam ang usa ka ibaligya online kung walay klaro nga presyo ug detalyadong description sa produkto.
Dapat matud pa nga magduda kung ang usa ka produkto walay igo nga impormasyon bahin kung unsa kini, tagpila kini, ug unsay mga features niini.
Dakong red flag usab kung ang presyo sa usa ka produkto sobra ka barato nga mahimong “too good to be true.”
Usa pa sa mga timailhan nga posibleng scam ang usa ka online seller mao ang walay DTI o Bureau of Internal Revenue (BIR) o Securities and Exchange Commission (SEC) registration o bisan unsang impormasyon bahin sa official store niini.
Kahibaloan nga ang usa ka lehitimong negosyo dapat rehistrado sa hustong ahensya sa gobyerno.
source: Victor Llantino
