Nagtuo ang urban planner nga si Architect Paulo Alcazaren nga daghan sa mga flood control structure nga gitukod sa DPWH dili epektibo sa pagkontrol sa mga sunod-sunod nga pagbaha sa nasud. Gihatag niini nga pananglitan mao ang mga dike ug mga flood barrier nga gihimong prayoridad sa ahensya isip flood mitigation structures nga ginatukod sa lain-laing bahin sa nasud.
Matod pa niini, nga daghan niini dili epektibo. Bisan pa man nga makatabang kini nga mahatagan og agianan ang tubig nga kasagaran magpundo kon adunay kusog nga ulan, ang tinuod nga mahitabo mao nga madala kini og dagkong bul-og sa tubig ngadto sa mga komunidad nga ubos ang lugar, hinungdan nga daghan gihapon ang mabahaan.
Ang gikinahanglan matud pa mao ang tukmang pagdumala sa natigum nga tubig gikan sa sunod-sunod nga ulan aron dili mapadulong ang dagayday niini ngadto sa mga ubos nga area sa komunidad ug magpabilin kini didto sulod sa taas nga panahon.
Girekomenda sa urban planner ang paghimo og hapsay nga master plan batok sa mga sunod-sunod nga pagbaha ug ang hugot nga pagsunod niini, gikan sa lokal nga panggamhanan, DPWH, ug apil na ang mga pribadong kompanya.
Sa ingon nga paagi, dili lang basta-basta nga matukod ang mga dike ug uban pang flood control structure, kondili, masubay kini sa base sa master plan.
Photo courtesy to: MIGUEL DE GUZMAN
