Gibutyag ni Commission on Elections (COMELEC) Chairman George Erwin Garcia nga tulo sa top 15 nga project contractors nga gihisgotan ni Presidente Ferdinand Marcos Jr. nalakip matud pa sa mihatag og donasyon sa kampanya sa pipila mga kandidato kaniadtong 2022 elections.
Matod ni Garcia, kining tulo ka mga kompanya nga wa pa hinganli nalakip sa listahan sa 31 ka mga kontraktor nga kasamtangang giimbestigahan sa COMELEC sa pakigtambayayong sa ilang Political Finance and Affairs Department (PFAD).
Dugang ni Garcia nga ang mga service contractor maapil usab sa ilang imbestigasyon ug dili lang sa pribado o government contractors ang motutok.
Samtang, nidugang si Garcia nga ipadala sa poll body ang nasangpit nga listahan uban sa ilang inisyal nga imbestigasyon ngadto sa Kamara isip kabahin sa ilang padayon nga pagrepaso aron masiguro ang transparency ug integridad sa mga proyekto ug kontrata sa gobyerno.
Matod niya nga nalakip sa maong dokumento ang kantidad nga gihatag sa kontraktor ngadto sa kandidato ug kon kinsa nga mga kandidato ang gihatagan sa pundo.
Kahinumduman nga gibutyag ni Presidente Ferdinand Marcos Jr., nga 100B sa kinatibuk-ang 545B nga pundo alang sa flood mitigation projects gikan Hulyo 2022 hangtod Mayo 2025 ang nahatag ngadto sa 15 lang ka mga kontraktor gikan sa 2,409 ka accredited contractors.
Apil niining 15 mao ang kompanya ni Lawrence Lubiano nga Centerways Construction and Development, Inc. nga kumpirmadong midonar og 30M alang sa kampanya ni Senate President Francis ‘Chiz’ Escudero sa 2022 elections.
Photo courtesy to:Philippine star
