Gimando ni Department of Public Works and Highways (DPWH) Secretary Vince Dizon ang pagbungkag sa Anti-Graft and Corrupt Practices Committee nga gitukod ni kanhi secretary Manuel Bonoan aron imbestigahan ang giingong kahiwian sa mga proyekto sa flood control sa ahensya.
Matod ni Dizon, dili angayan nga mohimo og imbestigasyon ang DPWH batok sa kaugalingong mga proyekto ug mga opisyal niini. Giinsister hinuon sa kalihim nga ang mga datos ug impormasyon kinahanglang isumite sa independenteng komisyon nga gitukod ni Presidente Ferdinand Marcos Jr.
Ang komite nga giumol ni Bonoan natukod pinasikad sa Department Order No. 166, series of 2025, nga nagtumong nga magsilbi nga public forum sa mga reklamo bahin sa mga anomaliya sa flood control projects sa nagkalain-laing dapit sa nasud.
Hinuon,giklaro ni Dizon nga kinahanglang mopatigbabaw ug tahuron ang direktiba sa Presidente. Sa iyang bahin, si kanhi kalihim Bonoan niingon nga bukas siya sa lakang ni Dizon, ilabi na kon makatabang kini sa kaayohan sa ahensya.
Gipasalig ni Dizon nga iyang hingusgan ang internal nga mga reporma sa DPWH, lakip na ang personal nga inspeksyon sa mga flood control projects aron masuta ang aktuwal nga kahimtang niini.
Ang pagbungkag sa komite kabahin sa mas lapad nga kampanya sa administrasyong Marcos batok sa korapsyon sa gobyerno.
via:DPWH
