Nanawagan ang Department of Science and Technology (DOST) sa mga ahensya sa gobyerno nga ibase ang mga programa sa pagkontrol sa baha sa siyensya ug datos tungod sa nagkagrabe nga krisis sa pagbaha sa nasud.
Niadtong sabado, Agosto 30, natala ang sinto baynte uno nga milimetro sa ulan sulod lang sa usa ka oras nga mibaha sa dili moubos sa 36-ka barangay sa ngadto sa kauluhan.
Matod pa ni DOST Secretary Renato Solidum Jr., nga kaya sa DOST nga ma-apply ang science and techonology aron nga masigurong magamit og sakto ang mga datos diha sa pagplano sa pagsolbad sa problema sa baha.
Ang pagbaha, sumala niya, dili masulbad sa one-size-fits-all approach, tungod kay ang matag suba o sub-river basin adunay lain-laing peligro.
Gipasabot sa hepe sa DOST nga ang ahensya makahatag og digital elevation models ug forecasting tools aron matabangan ang mga planner sa pagtimbang-timbang kung makaya ba sa mga suba ug drainage system ang mas kusog nga ulan tungod sa pagbag-o sa klima ug paspas nga urbanisasyon.
Nagpasidaan si Solidum nga ang dili maayo nga plano nga mga proyekto sa konstruksyon kasagaran mas mopagrabe sa pagbaha sa ubos nga mga lugar.
Kini ang rason, dugang niya, nganong ang mga proyekto sa pagkontrol sa baha kinahanglan ibase sa usa ka Geographic Information System (GIS) map aron mahatagan ang mga lokal nga gobyerno ug mga developer og mas klaro nga hulagway kung unsaon sa bag-ong mga imprastraktura pag-apektar sa mga kasikbit nga komunidad.
Photo courtesy: DOST Philippines
