Giselyohan na Bureau of Customs ang tanang 12 ka luxury vehicles sa mga Discaya nga nalista sa search warrant niini sa St. Gerard construction company sa Pasig City.
Gibutyag ni Customs Commissioner Ariel Nepomuceno niadtong Martes sa gabii, gi-surrender ang mga sakyanan ug kasamtangang gi-park sa St. Gerard Construction General Contractor and Development Corp’s compound.
Lakip niini ang Rolls Royce Cullinan 2023, Bentley Bentayga, Mercedes Benz G-Class (Brabus G-Wagon), Mercedes AMG G 63 SUV 2022, Toyota Tundra 2022, Toyota Sequoia, ug Cadillac Escalade ESV 2021. Samtang ang tulo ka mga sakyanan, Mercedes Benz G 500 SUV 2019, GMC Yukon Denali SUV 2022 (Gas), ug Lincoln Navigator L 2024, anaa sa mga awtorisadong service center gumikan kay giayo.
Dugang pa ni Customs Commisioner Nepumoceno nga ang tanang mga sakyanan giselyohan ug gimonitor sa mga personnel sa Bureau of Customs samtang ilang gisusi ang mga kalapasan sa mga Discaya sama sa kapakyas pagbayad og igong buhis ug pipila ka mga dokumento sa mga imported nga luxury cars.
Kahinumduman nga nikuha og search warrant ang BOC gikan sa korte alang sa verification sa 12 ka mga sakyanan ug gilayonng giadtoan ang balay sa tag-iya nga si Sara Discaya, apan niadtong Septiyembre 2 sa buntag, duha ra ang ilang nakita nga nag-parking sa balay nga nalista sa warrant.
Gumikan niini, gipasidan-an sa BOC si Discaya nga mag atubang kini og reklamo kung dili ipagawas ang mga sakyanan nga nalista sa ilang search warrant.
Gipasalamatan sa BOC ang pipila ka mga ahensya sa ilang tabang, lakip ang Department of Transportation (DOTr) – Land Transportation Office (LTO), Philippine National Police (PNP) – Eastern Police District (EPD), Highway Patrol Group (HPG), Philippine Coast Guard (PCG), ug mga opisyal sa Pasig City.
Photo courtesy to:BOC
