Nagkasabot ang mga lider sa China ug India nga magtinabangay ug dili mag-away atol sa ilang personal nga panagkita.
Gisiguro sa duha ka nasud nga andam sila sa pagpalig-on sa relasyon ug pakigtambayayong alang sa kalinaw ug kauswagan sa matag nasud.
Gihisgutan kini sa dihang nagkita si Chinese President Xi Jinping ug Indian Prime Minister Narendra Modi sa gilusad nga Summit sa Shanghai Cooperation Organization (SCO) sa Tianjin, China.
Ang duha ka lider nagpahayag nga ang panaghiusa mas mapuslan kaysa padayon nga panaglalis.
Kini mao ang unang higayon nga mibisita si Modi sa China sulod sa pito ka tuig, nga giisip nga positibong lakang sa paglambo sa relasyon sa duha ka mga nasud.
Lakip usab sa summit si Russian President Vladimir Putin ug kapin sa baynte ka uban pang mga lider sa kalibutan nga nag-apil sa panaghisgot kabahin sa seguridad, ekonomiya ug internasyonal nga kooperasyon.
Matud sa mga eksperto, ang maong kasabutan sa China ug India usa ka dako nga lakang aron malikayan ang posibleng panagbangi ug masiguro ang kalinaw sa Asya, hilabi na sa tunga sa nagkadako nga mga isyu pang-ekonomiya ug pangseguridad.
photo courtesy to:Business standards
