Nagpa-abot ug pasalamat si Kanhi PNP Chief Police General Nicolas Torre III sa publiko human sa iyang pagkatanggal isip hepe sa Philippine National Police. Sa iyahang social media post, gipadayag ni Torre nga mapasalamaton kini samtang iyang gi-share ang mensahe gikan sa usa ka fan page nga nagpasidungog sa iyang pag-serbisyo.
Ang pagtanggal kang Torre gisundan sa isyu nga mitumaw sulod sa kapulisan, diin ang Department of the Interior and Local Government (DILG) mipahibalo nga ang pagbalhin ni Torre sa pipila ka opisyal, lakip na si PLt. Gen. Jose Melencio Nartatez Jr., maoy usa sa hinungdan sa iyang pagtangtang.
Si Nartatez, nga Deputy Chief for Administration sa PNP, gibalhin unta ni Torre isip Area Police Commander sa Western Mindanao apan kini gibabagan sa National Police Commission (Napolcom). Matod ni Interior Secretary Jonvic Remulla, lisod apan gikinahanglan ang desisyon ug gihimo kini alang sa national interest. Gipunting usab nga kinahanglan nga respetohon ug lig-onon ang papel sa Napolcom sumala sa balaod.
Ang pagtan-aw sa Pangulo mao ang pagpadayon sa usa ka tinibuok direksiyon ug panaghiusa sa tanang bahin sa gabinete, ilabina sa mga ahensiyang may kalabutan sa seguridad ug kalinaw. Gisiguro usab ni Remulla nga posible hatagan gihapon ug laing posisyon sa gobyerno si Torre pinaagi sa pagdesisyon ni Presidente Ferdinand Marcos Jr. Kini samtang nagpabilin nga mainit ang diskusyon bahin sa iyang pagtangtang ug ang epekto niini sa liderato ug direksiyon sa PNP.
Photo courtesy to: Journalnews
