Magkauban ang upat ka mga anak ni kanhi Presidente Rodrigo Duterte sa ilang pagbisita sa International Criminal Court (ICC) aron bisitahon ang ilang amahan nga natanggong karon sa mga kaso may kalabotan sa kampanya batok sa ilegal nga drugas.
Si Davao City Representative Paolo “Pulong” Duterte mipaambit sa social media og litrato sa iyang kaugalingon ug sa iyang mga igsuon—Vice President Sara Duterte, Davao City Vice Mayor Sebastian “Baste” Duterte, ug ilang kamanghuran nga anak nga si Veronica “Kitty” Duterte. Ang hulagway nagpakita nga nagkita sila pag-usab sa The Hague, Netherlands.
Ang kanhi presidente gidakop niadtong Marso 11 pinasikad sa warrant of arrest nga giluwatan sa ICC kinsa nag-atobang sa kasong crimes against humanity kalabot sa kontrobersiyal nga war on drugs nga nagsugod niadtong Mayor pa sa Davao City ug tibuok nasud dihang nahimong presidente.
Bisan og nagdumili ang ICC sa paghatag og detalye sa kahimtang sa kaso, ang mga abogado sa kanhi presidente mikompirmar nga nagpadayon ang mga pagdungog sa korte ug pagrepaso sa mga ebidensya nga gipresentar batok kaniya. Samtang, padayon nga gisuportahan sa pamilyang Duterte ang ilang amahan.
via: Pulong Duterte FB Account
