Mabungahon nga gipahigayon ang makalingaw ug mabulokon nga parada sa Culmination Day sa Timpupo Festival nga nagsugod alas 5:30 sa buntag, Agosto 27, 2025.
Nanguna sa maong kalihukan si City Mayor Atty. Jose Paolo Evangelista kauban ang mga opisyal sa lokal nga panggamhanan ug konseho sa syudad.
Gipartisiparan usab kini sa daghang sektor lakip ang mga tunghaan, pribadong institusyon, government offices ug mga barangay.
Daghang mga floats nga puno sa nagkalain-laing klase sa prutas sama sa durian, mangosteen, marang, lansones ug rambutan ang gidayandayan ug gipakita sa maong parada.
Mibida usab ang mga contingents nga nagpakita sa traditional dances ug makapaanyag nga costumes nga nagpasundayag sa kultura ug kinaiya sa Kidapawan.
Libuan ka katawhan gikan sa lain-laing barangay ug silingang lugar ang miparada sa kadalanan nga mihatag kalipay ug garbo sa mga Kidapaweño.
Ang parada maoy nagtimaan sa opisyal nga pagsugod sa kulminasyon nga adlaw sa Timpupo Festival, diin gipakita ang abunda nga produkto ug paghiusa sa katawhan sa syudad.
