Nainsulto ang usa ka kongresista nga gikan sa Mindanao tungod sa pamahayag ni Baguio City Mayor Benjamin “Benjie” Magalong nga gitawag nga “moro-moro” ang imbestigasyon bahin sa mga anti-flood projects.
Matod ni House Deputy Majority Leader ug Lanao del Sur Rep. Zia Alonto Adiong, ang Kamara kinahanglan hatagan og respeto isip usa ka institusyon nga adunay mandato sa pag-imbestiga ug pagkolekta og ebidensya kalabot sa mga alegasyon.
Ang pagpanulti ug mga “sweeping labels” o padungog-dungog, sumala niya, makadaot sa dungog sa tanang miyembro sa Kongreso, lakip na ang mga nanerbisyo nga matinud-anon ug seryuso sa ilang katungdanan.
Nagpadayag si Magalong ug pagduha-duha sa imbestigasyon nga gihimo sa Kongreso kabahin sa giingong irregularity sa flood control projects ug iyang gisugyot nga adunay third-party inquiry.
Gipasanginlan usab sa mayor ang ubang mga magbabalaod nga nakadawat matud pa ug dagkong kickbacks gikan sa mga kontratista.
Tungod niini, giimbitar si Magalong sa gimugnang nga House tri-panel aron ipresentar ang iyang testimonya under oath ug ipagawas ang iyang ebidensya aron mapamatud-an ang iyang mga alegasyon nga gipagawas sa media.
Gawas sa isyu sa proseso, gihatagan usab ug gibug-aton ni Adiong nga ang paggamit sa pulong nga “moro-moro” adunay bug-at nga kahulugan alang sa mga Muslim tungod kay kini naggikan sa usa ka dula panahon sa Kastila, diin ang “Christians” ug “Moros” nagkontra — usa ka klase sa pasundayag nga may kalambigitan sa kolonyal nga stereotype ug dugay nang porma sa diskriminasyon.
Photo courtesy of radyopilipinas.ph
