Padayon nga gi-monitor sa Philippine Atmospheric, Geophysical and Astronomical Services Administration (PAGASA) ang usa ka low pressure area (LPA) nga namatikdan sa kapin 430 kilometro sa silangan-habagatang silangan sa Hinatuan, Surigao del Sur.
Base sa labing bag-ong datos, adunay dakong posibilidad nga mokusog ug mahimong usa ka tropical depression sa mosunod nga mga oras.
Ang maong LPA gilauman nga magdala og dag-om nga kalangitan, kalat-kalat nga pag-ulan, ug mga dalugdog sa Eastern Visayas, Caraga, ug pipila ka bahin sa Mindanao. Posible usab kini magresulta og baha ug landslide, labi na sa mga low-lying areas.
Samtang, ang Southwest Monsoon o Habagat nagpabilin nga nakaapekto sa kasadpang bahin sa Southern Luzon. Wala pay gibutang nga gale warning sa baybayon sa nasud, apan gipasidaan ang mga mananagat ug gagmay’ng sakayang pandagat nga mag-amping sa paglawig, ilabi na sa mga lugar nga apektado sa habagat.
Padayon ang pagbantay sa PAGASA sa lihok sa LPA nga kung molig-on ug mahimong bagyo, pagatawgon kini og “Bagyong Jacinto,” ang ika- napulo nga tropical cyclone nga mosulod sa Philippine Area of Responsibility karong tuiga.
Photo credit to PAGASA
