Gitamparos sa Tropical Depression ISANG kagahapong adlawa ang ubang bahin sa Luzon, diin napailawom kini sa Tropical Cyclone Warning Signal Number 1. Apan sa bag-ong datos nga gipaguwa sa DOST PAGASA, anaa na kini karon sa layong 410km West of Bacnotan, La Union ug pagawas na kini sa Philipine Area of Responsibility (PAR).
Samtang, aduna na usab gimonitor karon nga Low Pressure Area kon LPA gawas sa PAR nga wala matud pay tsansang mahimong bagyo apan lauman sa gihapon nga adunay kausaban niini sulod sa 24 oras.
Gilauman nga magpadayon ang mga pag-ulan sa tibuok nasud, ilabi na sa probinsya sa Davao del Norte, tungod sa epekto sa Southwest Monsoon o Habagat. Posible gihapon ang pagbaha ug pagdahili sa yuta sa pipila ka lugar nga adunay kusog nga pagbundak sa ulan.
Sumala sa ulahing datos nga gipagawas sa PDRRMO Davao del Norte karong Agosto 23, 2025, normal pa ang lebel sa tubig sa Menzi Bridge-Santo Tomas, Magupising Bridge-Tagum River, Pagsabangan Bridge, Libuganon River ug Saug Dam.
Samtang ang kahimtang sa kadagatan anaa sa 0.6 hangtod 1.8 metro ang pagbalod. Kabahin sa klema, natala ang minimum temperature nga 25.4°C alas 7 sa buntag ug maximum nga 29.2°C alas 2 sa hapon. Ang adlaw usab musubang alas 5:43 sa buntag ug mosalop alas 6:15 sa hapon.
Tungod sa hulga sa kalamidad, nagpahimangno ang mga otoridad sa publiko nga magpabilin nga alerto ug mag-monitor kanunay sa update sa panahon aron malikayan ang kadaot ug katalagman.
Photo courtesy to: DOST-PAGASA
