Nasamad ang ulo sa usa ka lalaki nga si Benjie, 52 anyos, lumolopyo sa Little Cebu, Barangay Lapasan, Cagayan de Oro City, human nabunalan kini og luwag sa iyang kapuyo atol sa ilang away sulod sa panimalay sa nasangpit nga dapit niadtong nakalabay nga adlaw.
Matod sa taho sa kapulisan sa Agora Police Station, ang biktima midangop pa sa kapulisan aron mangayo og tabang kay gipusposan siya og dako nga luwag nga para unta sa giluto nga binignit sa iyang asawa nga nagluto niadtong higayona.
Dugang pa sa mga otoridad, samtang nagluto ang iyang kapuyo og binignit para ibaligya, nagkalalis silang duha tungod kay wala siya motuo nga pakuguron siya og lubi aron isagol sa binignit nga giluto sa iyang asawa.
Segun sa imbestigasyon, nagkainit ang ilang away tungod kay misukol ang asawa ug kalit kining mikuha sa luwag nga stainless ug gibunal sa nagkadaiyang parte sa iyang kalawasan. Wala damha nga naigo ang iyang ulo ug miresulta sa pagkagisi niini.
Nagkadugo ang nawong ni Benjie ug gidali kini pagdala sa tambalanan aron matambalan ang samad nga iyang naangkon. Ang kaso gi-refer na sa Lupong Tagapamayapa sa nahisgutang barangay aron sa paghusay sa magtiayon.
Gipangutana ang bana kon mopasaka ba siya og kaso batok sa iyang asawa gumikan sa gibuhat niini, apan mitubag siya nga dili nalang siya mopasaka og kaso kay iya man usab nga sala nga wala siya mosugot sa sugo niini. Gipili niyang pasayloon ang asawa tungod kay mahal gihapon niya kini.
Photo Credits:atyourbusiness.com
