Gidala sa balay tambalanan ang driver ug pasahero sa Tamaraw FX human mabangga sa kasugat nga dumptruck niaging gabii didto sa National Highway barangay Crossing Libona Bukidnon.
Nailhan ang driver si alyas “Roger” 58 anyos, residente sa Purok 3b, sa nahisgutang dapit uban ang iyang duha ka pasahero nga myembro sa pamilya. Samtang ang driver sa dumptruck mao si alyas “Kevin” 28 anyos olitawo, lumulupyo gihapon sa nahisgutang dapit.
Base sa imbestigasyon sa kapolisan, samtang nagbyahe subay sa kurbadahon ug subidahong bahin sa maong dalan ang dumptruck, kalit misugat sa TOYOTA Tamaraw FX, kung asa misarasay sa dalan human nawad-ag control ang driver hinungdan sa panagbangga.
Tungod sa impact bungkag ang sakyanan hinungdan nakahiagom ug samad sa kalawasan ang pasahero niini samtang nadaot usab ang atobangan nga bahin sa dump truck.
Natanggong na sa Libona Municipal Police Station ang mga nalambigit nga sakyanan alang sa tukmang disposasyon ug dukomentasyon.
via: Libona Municipal Police Station
