Gimando sa Department of the Interior and Local Government (DILG) ang pagbutang og mga barangay tanod human sa nahitabong pagpamusil sulod sa mga tunghaan.
Matod sa DILG, ang mga barangay tanod maoy gitahasan sa pagmonitor ug pagtaho sa mga insidente nga makahulga sa kaluwasan sa mga estudyante, magtutudlo, ug mga kawani sa eskwelahan.
Mopahigayon ang mga barangay tanod usab og traffic management, sa pagpatrolya sulod sa mga tunghaan, ug pagbantay sa mga school zone.
Kinahanglan usab ang mga lokal nga punong ehekutibo nga maghatag kompleto nga suporta sa logistik sa mga barangay.
Kahinumduman nga sunodsunod nga insidente sa pagpamusil ang natala sa pipila ka mga dapit sa nasud sa milabay nga mga adlaw, lakip na ang insidente sa pagpamusil sa Nueva Ecija diin usa ka 18-anyos nga estudyanteng lalaki ang gidudahang mipusil sa iyang 15-anyos nga kanhi uyab sa Sta. Rosa Integrated School niadtong Agosto 7, gipatay silang duha.
Laing insidente sa pagpamusil usab ang nahitabo niadtong Agosto 4 sa Balabagan Trade School sa Lanao del Sur diin usa ka tinun-an ang nipusil sa iyang magtutudlo human kini gihatagan og palpak nga grado sa usa ka exam.
Matod ni Department of Education (DepEd) Sec. Sonny Angara, gitan-aw sa ahensya ang mas lawom nga mga hinungdan luyo sa mga insidente sa krimen sa mga eskuylahan, lakip ang posible nga pagka-expose sa mga bata sa social media.
photo credits:assistance.ph
