Pakusgan sumala pa ni Presidente Ferdinand Marcos Jr. sugod kagahapong adlawa, Agusto 11, 2025 ang “Sumbong Sa Pangulo” nga website, diin i-upload ang listahan sa mga flood control projects aron tugotan ang publiko nga masusi ug makahatag og feedback sa imprastraktura nga gipondohan sa gobyerno sa ilang palibot.
Sumala ni President Marcos Jr., iyang personal nga susihon ang mga mulo sa publiko sa giingong website.
Kini agig tubag sa pahayag ni Marcos nga daghang mga indibidwal ug mga korporasyon nga nalambigit sa mga kurakot nga laraw sa Department of Public Works and Highways ang naila, ug midugang nga sila sa dili madugay ma-blacklist sa mga proyekto sa gobyerno.
Wala hinganli ni Marcos kon kinsa kining mga kontraktor, apan namatikdan nga sa dili madugay, ipasaka ang mga kaso batok niining mga tawo ug mga kompanya nga nakahatag og “palpak” nga mga proyekto.
Atol sa iyang State of the Nation Address niadtong Hulyo, nimando si Marcos og imbestigasyon sa posibleng kurapsyon sa mga flood control projects human ang pipila niini, napakyas sa dihang pagbunok sa ulan nadala sa mga bagyo ang mga gimontar nga flood control nga mga proyekto ug mi-resulta sa pagbaha sa nagkadaiyang dapit sa nasud.
photo credits:manilastandard.net
