𝗟𝗔𝗟𝗔𝗞𝗜 𝗡𝗔𝗚-𝗔𝗡𝗧𝗢𝗦 𝗦𝗔 𝗞𝗜𝗗𝗡𝗘𝗬 𝗙𝗔𝗜𝗟𝗨𝗥𝗘, 𝗛𝗨𝗠𝗔𝗡 𝗦𝗔 𝟮,𝟬𝟬𝟬 𝗦𝗤𝗨𝗔𝗧𝗦 𝗔𝗥𝗢𝗡 𝗠𝗔𝗗𝗔𝗢𝗚 𝗦𝗔 𝗣𝗨𝗦𝗧𝗔

Nag-aguroy sa kasakit ang usa ka lalaki, human sa bag-ohay gireport sa doktor sa Primorsky Krai, nasud Russia, sa usa ka talagsaon nga kaso sa 20-anyos nga lalaki nga na-ospital tungod sa grabe nga pagkunhod sa function sa kidney tungod sa sobra nga pisikal nga pagpaningkamot.

Matod sa pasyente, nagsugod ang iyang problema human siya makadaog og pusta diin gihagit siya sa iyang higala nga mohimo og 2,000 squats sulod sa gitakdang oras.

Tungod sa grabeng pisikal nga pagpaningkamot, nadaot ang kaunoran sa iyang bitiis, hinungdan nga nitaas ang lebel sa creatinine ug urea.

Nasuta sab nga 50% ra ang function sa iyang kidney. Maayo na lang kay natambalan sa mga doktor ang iyang acute renal failure nga wala na kinahanglana ang dialysis.

Sa pagkakaron, nagpabiling ubos ang function sa iyang kidney ug kinahanglang mopailalom siya sa rehabilitasyon nga molungtad gikan sa tulo ka buwan ngadto sa usa ka tuig.