TAGUM CITY- Nagmahay karon ang usa ka 19-anyos nga lalaki nga giilang si Jeffrey Requita, usa ka helper ug temporaryong residente sa Purok 3, Bliss, Barangay San Miguel, Tagum City, Davao del Norte,kinsa nadakpan sa mga otoridad tungod sa kaso sa pagpangawat niadtong Agosto 4, 2025.
Sumala sa reklamo ni Riziel Salcedo Resonar, 31 anyos, minyo, ug tag-iya sa Salcedo Resonar Beverages Trading, alas 8:00 sa buntag sa maong adlaw, ilang opisina giingong gisulod ug gikawatan.
Base sa CCTV footage, nakita nga si Requita maoy nag-guba sa pader ug mikawat sa usa ka improvised nga alkansya nga gihimo sa lata kon piggy bank. Ang alkansya adunay sulod nga Php 6,000 nga pulos tig Php 20 nga sensilyo.
Sa pagkadungog sa maong insidente, ang kapulisan sa Tagum City Police Station, ubos sa pangulo ni PCPT Benjie Solteo ug sa direktang superbisyon ni PLTCOL Frederick Deles, ang Acting Chief of Police sa Tagum CPS, gilusad ang operasyon batok sa suspetsado.
Bandang alas 12:10 sa udto, malampuson nilang nadakpan si Requita sa Purok 6, Sitio Lawaan, Barangay Mabaos, lungsod sa Carmen. Narekober usab sa mga pulis ang usa ka kutsilyo gikan sa suspek.
Sa imbestigasyon, nasayran nga ang suspek gibalhin ang kwarta ngadto sa personal niyang alkansya nga nahimutang sa iyang gipuy-an.
Gidala ang suspek sa istasyon kauban ang nakumpiskar nga kutsilyo ug duha ka alkansya nga adunay sulod nga Php 3,360 nga pulos tig Php 20 nga sinsilyo.
Giandam na karon ang mga dokumento alang sa pagsang-at og kasong pagpanikas ug pagpangawat batok kang Requita, ubos sa kalapasan sa balaod sa Republic Act 1780.
