Gipasalig sa Department of Labor and Employment kon DOLE nga dili supakon sa kasamtangang administrasyon ang gisugyot nga across-the-board nga usbaw sa suholan sa Kongreso.
Sumala ni Labor Secretary Bienvenido Laguesma, kon mapatuman ang usbaw sa suholan, katungdanan sa departamento ang pagpatuman niini.
Kini human gikuwestiyon sa daghang labor groups ang wala paghisgot sa usbaw sa suholan sa State of the Nation Address kon SONA sa Presidente.
Dugang ni Laguesma nga mahimo ra nga maghatag ang ahensya og mga teknikal nga sugyot samtang ang sugyot hisgutan sa Kongreso.
Sa pag-abli sa 20th Congress, daghang mga magbabalaod sama nila ni Senador Bong Go, JV Ejercito, Risa Hontiveros ug mga party-list representatives ang nipasaka og wage hike bills.
Sa kasamtangan, ang minimum wage sa Metro Manila anaa sa Php695 samtang sa BARMM anaa sa Php 411, nga gikonsiderar nga pinakaubos nga sweldo sa tibuok nasud.
