MALAYBALAY CITY- Mibangga sa usa ka metal post ang driver sa single motor human maaksidente pasado alas 5 sa buntag Agosto 1, 2025, didto Purok-8, Barangay Mibantang, Quezon, Bukidnon.
Gimaneho ang maong Suzuki Raider – 150, ni Larry Terec, 21 anyos residente sa Purok-2, Barangay Cebole, sa nasangpit nga lungsod.
Base sa inisyal nga imbestigasyon sa kapolisan, si Terec nagbiyahe gikan sa Barangay Cebole paingon sa Barangay Salawagan, apan pag-abot sa nahitaboan, kalit kini nawad-ag kontrol ug mibangga sa metal post nga anaa sa kilid sa kanal.
Tungod sa kakusog sa impact, grabe ang kadaot sa motorsiklo ug naangol usab ang driver kinsa nakaangkon og seryosong samad sa kalawasan, rason nga daling gidala sa Quezon Health Center Infirmary aron matambalan.
Nagpahimangno karon ang Quezon Municipal Police Station sa publiko nga mag-amping kanunay sa pagmaneho ug maghinay sa dagan alang sa kaluwasan sa tanan.
