NABUNTURAN- Gitigbas sa kaugalingong igsoon ang usa ka 34-anyos nga lalaki hangtod namatay, samtang nasamdan usab ang iyang kapuyo ug 11 ka buwan nga anak pasado alas 3:00 sa kaadlawon, niadtong nakalabay nga adlaw, sulod sa ilang compound sa Purok 1-B, Baring, Barangay Wangan, Calinan District, Davao City.
Nasuta sa imbestigasyon sa kapulisan nga nag-inom ang biktima nga si alyas John, usa ka construction worker, ug ang suspek nga si alyas June, 39 anyos, usa ka laborer, pasado alas 10:00 sa gabii niadtong Hulyo 19.
Pagkahuman sa ilang tagay, pasado alas 3:00 sa kaadlawon,July 20, 2025 mipauli ang suspek sa ilang panimalay, diin nanghasi siya sa iyang asawa ug giakusahan kini nga adunay relasyon sa iyang igsoon.
Tungod sa hulga, mibakwit ang asawa dala ang ilang tulo ka anak ug nangayo og tabang sa mga silingan. Midiretso dayon ang suspek sa panimalay sa iyang igsoon, nga may dalang pinuti.
Gipugos niya pagsulod ang balay sa biktima ug didto, gitigbas niya kini sa makadaghang higayon, og naningkamot pa ang sa biktima nga panalipdan ang kaugalingon ug iyang pamilya. Nadunggaban usab ang kapuyo sa biktima nga si alyas Ana, ug ilang 11 ka buwan nga anak.
Ang biktima namatay diha-diha sa gawas sa ilang balay, samtang dali nga gidala sa mga silingan sa duol nga tambalanan ang asawa ug anak ug sa pagkakaron luwas na sa kamatayon.
Naaresto ang suspek sa kapulisan ug gisurender usab ang pinuti nga gigamit sa krimen. Matod pa sa suspek, nabuhat niya ang maong kremin tungod sa selos.Ang suspetsado mag-atubang sa kasong murder ug frustrated murder.
Ctto:PIO DCPO
