TAGUM CITY- Patay ang usa ka lalaki samtang duha ang angol sa bangga sa duha ka motorsiklo sa Brgy. Apokon, Tagum City niadtong nakalabay nga adlaw. Giila sa kapulisan ang biktima nga si alyas “Khin” 20-anyos ug ulitawo, kinsa nagsakay sa usa ka Honda nga motorsiklo nga gimaneho ni alyas “Dioscoro”, 42-anyos, ulitawo.
Ang laing motor nga nalambigit sa insidente mao ang usa ka blue nga Suzuki Raider 150 nga gimaneho ni alyas “Jay”, 21-anyos, residente sa Laak, Davao de Oro.
Sumala pa sa imbestigasyon sa Tagum City Police Station, nahitabo ang aksidente sa Apokon Road. Patabok matud pa ang gisakyan nila alyas “Khin” sa maong kalsada dihang nabangga kini sa kilid sa miagi nga Suzuki Raider, nga paingon sa Maco, Davao de Oro.
Tungod sa kakusog sa impact, natumba ang duha ka motorsiklo ug nanga-angol ang mga sakay. Daling gidala sa balay tambalanan ang tanang nalambigit sa aksidente, apan walay swerteng nakabsan sa hinulamang kinabuhi ang usa ka biktima tungod sa grabeng samad nga na-angkon gumikan sa maong akidente.
