TAGUM CITY- ARESTADO ang usa ka lalaki nga wanted sa pagpanulis sa usa ka coordinated operation nga gipangulohan sa Panabo City Police Station, Davao Norte Provincial Mobile Force Company kon DNPMFC, ug Davao Norte Provincial Investigation and Detection Management Unit.
Gikasa ang Manhunt Charlie Operation mga alas 8:30 sa buntag sa Purok 3, New Malaga, Barangay Dalisay, Panabo City nga ming-resulta sa pagkasikop sa 36-anyos nga si alyas “Bon”. Ang suspek nga taga Kapalong, Davao del Norte, nag-atubang og duha ka ihap sa pagpanulis sa usa ka walay nagpuyo nga lugar.
Nasikop ang suspek pinasikad sa warrant nga giisyu ni Honorable Presiding Judge Evalyn Morales sa 11th Judicial Region, 1st Municipal Circuit Trial Court sa Carmen-Sto Tomas-Braulio E. Dujali, Davao norte.
Nagtakda ang korte og piyansa nga mokabat sa Php12,000 matag usa sa duha ka kasong kriminal. Kabahin ang maong operasyon sa padayong paningkamot sa mga lokal nga awtoridad sa pagpangita ug pagdakop sa mga wanted nga indibidwal sa nahisgutang probinsya ug rehiyon.
