Nabaniog sa India si Constable Atul Sharma human nag-viral sa mga social networking sites diin makita siya nga naghatag og cardiopulmonary resuscitation (CPR) o mouth to mouth resuscitation sa usa ka bitin nga gihiloan sa pestisidyo.
Ang insidente nahitabo sa usa ka dili venomous nga bitin nga misulod sa pipeline sa usa ka residential colony. Wala makuha ang bitin sa pipeline, gibuboan kini og pestisidyo sa mga residente. Kay wala mahibalo kon unsay sunod nga buhaton, nangayo silag tabang sa kapolisan.
Ang miresponde nga pulis mao si Atul Sharma, usa ka giproklamar nga “snake rescuer”. Ang viral nga video nagpakita nga si Sharma diha-diha dayon naghatag sa bitin nga mouth-to-mouth resuscitation human kini makuha gikan sa pipeline, dayon gibuboan kini og limpyo nga tubig aron mahugasan tungod kay nakaligo kin isa pestisidyo. Dihang naulian sa panimuot ang bitin, namakpak ang mga tawo sa iyang palibot.
Si Sharma miingon nga nakaluwas siya og 500 ka mga bitin sa miaging 15 ka tuig isip usa ka “snake rescuer”. Nahibal-an niya kung giunsa pagluwas ang mga bitin pagkahuman nagtan-aw sa mga dokumentaryo sa hayop sa Discovery Channel.
Gisaway sa pipila ka mga beterinaryo sa India ang video, nga nag-ingon nga ang mouth-to-mouth resuscitation dili makapabuhi sa usa ka himatyon nga bitin. Mahimong naatol lang nga nakaamgo ang bitin.
Apan bisan pa niini, daghan gihapon sa mga netizens ang nakadayeg kang Sharma ug gikonsiderar kini nga “bayani” tungod sa iyang kaisog sa pagluwas sa bitin.
