Giakusahan usa ka kompanya sa China ang dili patas nga mga gawi sa pagtrabaho human gibalhin ang opisina niini sa usa ka hilit nga bukid aron pugson ang mga empleyado nga mo-resign!
Nakurat ang mga empleyado sa wala hinganli nga advertising agency sa Xi’an City, Shanxi Province human kini mipahibalo nga ang opisina niini ibalhin sa kabukiran.
Ang bag-ong lokasyon sa opisina anaa sa Qinling Mountains, tulo ka oras ang gilay-on gikan sa Xi’an City. Gawas nga layo kaayo, limitado ang pampublikong transportasyon. Kon wala kay kaugalingong sakyanan, kinahanglang mosakay ka ug bus nga modagan lang katulo sa usa ka adlaw. Human sa pagkanaog sa bus, kinahanglan ka nga maglakaw tulo ka kilometro paingon sa opisina.
Human sa pipila ka adlaw nga pagtrabaho sa opisina, nasuta sa mga empleyado nga kulang sa basic amenities ang opisina ug kinahanglang moadto sila sa sunod nga lungsod aron mogamit og saktong kasilyas. Daghan usab ang mga irong ihalas nga nagsuroysuroy sa maong dapit ug delikado ang paglakaw sa gabii.
Kadaghanan kanila wala makaagwanta ug 14 sa 20 ka mga empleyado ang ni-resign. Upat ka adlaw human mi-resign ang 14 ka empleyado, gibalhin dayon sa ad agency ang opisina balik sa Xi’an City ug nangitag bag-ong mga empleyado.
Matod sa usa sa mga empleyado nga ni-resign, ang maong buhatan gituyo nga gibalhin sa hilit nga dapit aron sila maka-resign ug makadaginot sa severance pay.
Kini nga insidente nahimong viral sa mga Chinese netizens ug kanhi mga empleyado giawhag sa pagpasaka og kaso. Sa pagkakaron, gipaabot pa kung mokiha ba sila.
