KIDAPAWAN CITY- Nakigpinusilay sa kapulisan ang usa ka suspek sa drug buy-bust operation sa Barangay Cannery ,Polomolok sa sayong buntag niadtong Lunes, Hulyo 14, 2025, duol sa usa ka gasoline station.
Base sa imbestigasyon sa kapulisan, gipahigayon ang operasyon batok sa usa ka drug suspek nga gi-monitor sa dugay na nga panahon.
Sa video footage nga nakuha sa maong insidente, makita ang usa ka sakyanan nga mihunong sa gas station ug dayong tapok sa mga lalaki nga gituohang mga operatiba.
Apan kalit nga midagan ang sakyanan bisan pa nga abli pa ang pikas pultahan niini. Gigukod kini sa mga operatiba ug misulod sa pikas establisyemento nga tupad sa gasolinahan, diin kini nibangga sa possibleng barrier.
Human sa pagbangga, nadungog ang pipila ka buto sa armas, nga nagresulta sa tensyon sa lugar. Walay sibilyan nga nadamay sa insidente, apan posible nga naangol ang suspek, nga giluwas dayon sa awtoridad ug gidala sa ospital alang sa medical nga atensyon.
Nagpadayon ang imbestigasyon sa PNP Polomolok aron tukion ang tibuok panghitabo ug pagkolekta sa dugang ebidensya, lakip na ang drugas nga possibleng narekober sa operasyon.
