DIGOS CITY- Patay ang usa ka sales officer human kini makuryente, ug mahulog sa hagdanan sa ilang panimalay sa Purok Apitong, Corner Bonifacio 4th, Barangay Zone 3, Digos City. Giila sa kapulisan ang biktima nga si alyas “Ken” og anaa na sa hingkod nga pangidaron. Nahitabo kini niadtong nakalabay nga adlaw.
Sa pagresponde sa CDRRMO, naabtan ang biktima nga wala nay kinabuhi nga anaa sa hagdanan. Base sa kasayuran nga nakuha gikan sa iyang asawa ug paryente, ang biktima nag-ayo sa ilang linya sa kuryente sa kwarto sa taas sa ilang balay dihang siya nakuryentehan ug nahulog sa hagdanan, hinungdan sa iyang hinanaling kamatayon.
Samtang walay nakita nga foul play ang kapulisan sa maong insidente. Sa karon,ang patay nga lawas sa biktima gipahiluna na sa inilang Funeral Homes sa Barangay San Jose,Digos City.
Sa pikas nga bahin, nagpahimangno ang kapulisan sa publiko nga mag-amping ug magpakonsulta sa eksperto kung mag-ayo sa linya sa kuryente aron malikayan ang susamang insidente.
